Një shtetas kosovar ka humbur jetën nga përmbytjet në Gjermani e po ashtu edhe një person tjetër që njërin prind e kishte me shtetësi të Kosovës. Lajmin e ka konfirmuar për Radio Evropa e Lirë Ministria e Punëve të Jashtme dhe Diasporës në Kosovë.
“Bazuar në të dhënat zyrtare, deri më tani ka humbur jetën një person me shtetësi kosovare, si dhe një person tjetër që ka njërin prind me shtetësi të Kosovës, përderisa viktima mban shtetësinë gjermane”, thuhet në deklaratën e MPJD-së.
Gjatë javës së fundit Gjermania është përfshirë nga përmbytje të shumta që kanë shkaktuar dëme të mëdha dhe qindra viktima. Dy landet më të prekura kanë qenë Rajnland Falc dhe Nordrajn Vesthalen.
Ditën e sotme kancelarja Angela Merkel vizitoi sërish zonat e përmbytura, ndërsa premtoi ndihmë për njerëzit e prekur. Ndërkohë, qeveria deklaroi se po përgatit një paketë të madhe financiare për rajonin që është goditur rëndë nga reshjet.
Gjermania është vendi që është goditur më keq nga përmbytjet në Europën Perëndimore dhe po ashtu janë prekur edhe Holanda, Belgjika, Zvicra dhe Luksemburgu. Numri i viktimave në Gjermani i ka kaluar 160, ndërsa në gjithë vendet e prekura numri po arrin 200. Gjithashtu është raportuar për mijëra të tjerë që janë zhdukur, ndërsa ditën e djeshme u arrit të vendosej kontakt me 700 prej tyre.
