Ditën e sotme Kryetari i Partisë së Lirisë, Ilir Meta deklaroi se për kallëzimet në lidhje me çështjen e inceneratorëve, është marrë më së shumti, paraardhësja e tij në detyrë, Monika Kryemadhi dhe nuk e di me siguri nëse ish zëvendës kryeministri Arben Ahmetaj është kallëzuar në SPAK. Në emisionin “Now”, Meta u shpreh se Ahmetaj, por edhe të tjerë duhet të ndiqen penalisht edhe nëse nuk kanë përgjegjësi të drejtpërdrejtë.
“Këtë gjë nuk mund ta them me siguri të plotë, sepse me këtë çështje është marrë Lëvizja Socialiste për Integrim, zonja Kryemadhi mund të ishte intelekutorja më e përshtatshme sepse është marrë me shumë detaje me çështjen. Por padyshim edhe ai mund të ishte dhe ai duhet të jetë për përgjegjësinë e tij, për aq sa e ka, për të gjitha ato vendime që ka kaluar në mbledhjet e qeverisë, edhe nëse nuk ka një përgjegjësi të drejtpërdrejtë”, theksoi ai.
Teksa u pyet në lidhje me paditë e ngritura ndaj tij, Meta tha se ato janë të gjitha përralla nga Rama. Më tej, ai shton se shumica e personave që kanë bërë paditë, marrin rrogë në kryeministri dhe në Bashki. Ai shton se nuk ka asnjë shqetësim për kallëzimet që bëhen e që i bën.
‘Të gjitha paditë ndaj meje përralla të Edi Ramës, shumica që kanë bërë paditë marrin rrogë në kryeministri, në Bashkinë e Tiranës. Nuk kam asnjë shqetësim, kallëzimet që kam bërë i kam bërë në emrin tim, me numra llogarie, me emra konkretë.‘- tha Meta.
