Prokuroria që heton vrasjen e 25-vjeçarit Klodian Rasha, tha se, ai ka ndërruar jetë nga një plumb në pjesën e shpatullës, që i ka prekur zemrën.
Megjithatë familjarët pretendojnë se, viktima ka shenja në kokë, dhe nuk e dinë se nga se janë shkaktuar.
Gazetari Spartak Koka deklaroi pak më parë live nga emisioni “Opinion” se, disponon fotografitë e të ndjerit, ku dallohet plagë në kokë, ku ka edhe 10 të qepura. Ai tha se, dallohen edhe hematoma në pjesën e ballit dhe hundës.
“Janë foto të trupi që tregojnë një plagë në këtë krah, ka dhjetë të qepura në kokë, hematoma në pjesën e ballit dhe hematoma në hundë për shkak të thyerjes.
Nuk dihet plaga që ka goditje në kokë, nga se është shkaktuar. Ndërsa prokuroria thotë se ka vetëm një goditje në shpatull”,- deklaroi gazetari Koka Live në emisionin “Opinion”.
“Ka dhjetë të qepura në kokë, hematoma në pjesën e ballit, hematoma në fytyrë dhe në pjesën e hundës, por që nuk dihen se nga janë shkaktuar. Familjarët kanë parë foton dhe kufomën dhe thonë, që sipas tyre është armë zjarri”,- u shpreh Spartak Koka ndërsa tha që tashmë i takon Mjekësisë Ligjore të sqarojë plagët.
Ndërkohë sipas gazetarit kjo e komplikon situatën, në një kohë kur Prokuroria ka deklaruar se në trupin e të riut është qëlluar vetëm 1 plumb, ndërkohë që sipas të dhënave nga SHÇBA u tha se, nga arma e policit është qëlluar 2 herë.
“Prokuroria thotë se ka vetëm një goditje me armë zjarri në shpatull. Ndërkohë sipas të dhënave nga SHÇBA nga arma e policit ëshë qëlluar 2 herë”,- tha Koka.
/Burimi: Opinion.al/GazetaReforma.com/
