Ditën e sotme ish-kryetarja e Kuvendit, Jozefina Topalli ka deklaruar në “klannews” se nuk e kishte menduar kurrë postin e kryetares së PD-së, duke nënkuptuar kështu se nuk do të kandidojë as në zgjedhjet e datës 22 maj.
Ajo tha se nuk mendonte se ishte e nevojshme të ishte në pozicione drejtuese për të bërë beteja apo për të thënë ato të vërteta për të cilën njerëzit heshtin.
Pyetje: A e keni menduar ndonjëherë të bëheni kryetare e partisë Demokratike?
Topalli: Jo nuk e kam menduar asnjëherë në jetën time për t’u bërë kryetare e partisë. Unë kam menduar gjithmonë që të them të vërtetat të një realiteti që kjo forcë politike ka kaluar gjatë këtyre tre dekadave. Ka një histori dhe një trashëgimi shumë të veçantë për të cilën nuk ka pse mos të jemi krenarë, ashtu sikurse ka kaluar 10 vitet e fundit, vite që nuk e nderojnë atë.
Nuk e kam menduar një gjë të tillë. E kam thënë dhe e përsëris prapë. Qoftë nga historia personale kam mësuar se nuk është nevoja për të qenë në poste drejtuese apo për të qenë në parlament për të bërë beteja apo për të thënë disa të vërteta për të cilat shumë gjatë dhe shumë njerëz kanë heshtur. Unë kam thënë do vijoj të jem vetja ime, dhe do vazhdoj të jem vetja ime, sigurisht një mbështetëse e patundur e besimeve të atyre parimeve që i kam thënë prej kohësh. Ngritja në këmbë e sallës gjatë Kuvendit kur unë u ngrita me shumë emocion të them të drejtën ka qenë gjëja më unike që kam përjetuar ndonjëherë.
