Agjencia e Prokurimit Publik ka vendosur në listën e zezë, kompaninë DH-Albania, që menaxhohej nga nipi i biznesmenit Bashkim Ulaj, Avdiol Domi.
Ky i fundit është ende në kërkim nga autoritetet shqiptare për falsifikimin dhe vjedhjen e tenderit në Unazen e Re në Tiranë.
Në buletinin e fundit të kësaj kompanie, të datës 15 prill 2019, thuhet se DH-Albania, përjashtohet nga pjesmarrja në tender për një periudhë 3 vjeçare, deri në vitin 2022.
“Operatori ekonomik i regjistruar në Qendrën Kombëtare të Regjistrimit me emër subjekti DH-Albania, degë e shoqërisë së huaj “Dunwell Haberman LLC”, Shoqëri me përgjegjësi të kufizuar, me Nipt L81918008S, me seli në Tiranë, përjashtohet – 3 (tre) vjet (duke filluar prej datës 07.02.2019 – 07.02.2022)” – shkruhet në buletinin e APP-së.
Ndërkaq, kjo agjenci, ka vendosur në listën e kompanive të zeza edhe një tjetër kompani shqiptare BIBA X.
“Operatori ekonomik i regjistruar në Qendrën Kombëtare të Regjistrimit me emër subjekti BIBA-X, Shoqëri me përgjegjësi të kufizuar, me Nipt K32618815N, me seli në Kavajë, përjashtohet – 3 (tre) vjet (duke filluar prej datës 21.02.2019 – 21.02.2022)” – shkruhet në dokumentin e APP-së.
Kompania DH Albania, pronë e personit 26 vjeçar, Avdiol Domi, është përjashtuar nga tenderat që në fillim të shkurtit. Kjo ndodhi pasi u zbulua skandali se veç tenderit të Unazës së Re, kompania e Bashkim Ulajt, në bashkëpunim me BIBA-X, kishin fituar miliona lekë në një tender të OST-së, dhe këtë, me dokumente të falsifikuara.
‘Biba-X’ është regjistruar në Kavajë në vitin 2002, me objekt prodhim të materialeve të ndërtimit, kryesisht prodhim dhe tregtim inertesh. Më 15 tetor 2018, ortaku i vetëm, Barush Biba ka ndryshuar objektin e kompanisë duke shtuar objektin “ndërtim rrugësh, ndërtime civile, rikonstruksion godinash fasadash.”
Ndërkohë të dhënat theksojnë që DH Albania dhe BIBA- X bashkëpunuan edhe për unazën e re.
