Një tjetër person i infektuar nga Covid-19 ka ndërruar jetë në spitalin “Shefqet Ndroqi”, duke e çuar në 28 numrin e viktimave në vendin tonë.
Në një njoftim për shtyp, Ministria e Shëndetësisë shkruan se viktima është një 60-vjeçar nga Tirana, me iniciale R.K., që kishte 2 javë në reanimacion në gjendje shumë të rënduar shëndetësore.
Po ashtu, viktima vuante edhe nga disa sëmundje bashkëshoqëruese, si diabeti melitus, kardiopatia hipertensive, nefropatia diabetike, obeziteti.
Mëngjesin e sotëm ka ndërruar jetë një pacient 60-vjeçar në spitalin universitar “Shefqet Ndroqi, i konfirmuar me COVID19. 60-vjeçari R.K nga Tirana ishte i shtruar në reanimacion prej dy javës në spitalin “Shefqet Ndroqi” në gjendje shumë të rëndë shëndetësore. Pacienti vuante nga disa sëmundje bashkëshoqëruese (Diabet Melitus, Kardiopatia Hipertensive, Nefropatia Diabetike, Obezitet).
Pavarësisht trajtimit të bërë nga stafi mjekësor, asistencës të ventilimit mekanik të respiracionit dhe mjekimit intensiv, 60-vjeçari nuk ka mundur të mbijetojë. Ministria e Shëndetësisë dhe Mbrojtjes Sociale i shpreh ngushëllimet familjarëve dhe bën thirrje të gjithë qytetarëve të vazhdojnë të respektojnë rregullat e vendosura. Deri tani 28 qytetarë nuk e kanë fituar dot betejën me COVID19, pavarësisht punës së madhe të stafeve mjekësore të spitaleve COVID”, njofton Ministria e Shëndetësisë.
