Vetëm katër ditë pas ekzekutimit të Haxhi Baçinozit tek Liqeni Artificial në Tiranë gjatë kohës që ishte duke vrapuar me të birin, autori i krimit është dorëzuar pranë Policisë së Shtetit.
Ky lajm është bërë i ditur nga vetë uniformat blu, të cilat kanë bërë me dije se Islam Myrakaj, 61-vjeç nga Fieri është vetëdorëzuar. Megjithatë sipas njoftimit të policisë, efektivët blu kanë qenë në negociata e sipër me avokatin e të dyshuarit, gjë që ka sjellë më pas edhe dorëzimin e tij.
Ngjarja e tmerrshme e ndodhur tek Liqeni Artificial rreh orës 18:15, ka tronditur jo vetëm personat e pranishëm në vendngjarje, por gjithë opinionin publik, për vet faktin se i ndjeri ka qenë edhe ish- i burgosur politik gjatë regjimit komunist.
Njoftimi i Policisë
Pas një pune të mirëfilltë hetimore dhe profesionale, të bërë nga grupi i posaçëm hetimor i ngritur në Drejtorinë Vendore të Policisë Tiranë, në drejtimin e Departamentit të Policisë Kriminale në Policinë e Shtetit, për zbardhjen e vrasjes së ndodhur më datë 16 mars 2019, rreth orës 18:15, tek Liqeni Artificial, ku mbeti i vrarë me armë zjarri, shtetasi H. B., 62 vjeç, u bë e mundur zbardhja e ngjarjes dhe dokumentimi me prova ligjore i autorësisë së kësaj ngjarje.
Pas trysnisë së madhe të ushtruar nga Policia e Tiranës, kontrolleve të shumta për kapjen e autorit, si dhe negociatave të bëra mes Policisë dhe avokatit të autorit të dyshuar, autori i dyshuar, shtetasi I. M., 61 vjeç, nga Fieri, rreth orës 19.30 është vetëdorëzuar në Drejtorinë Vendore të Policisë Tiranë i shoqëruar nga avokati i tij. Në bashkëpunim me Prokurorinë vijojnë veprimet e mëtejshme proceduriale.
