Një tjetër atentat i ndodhur mbrëmjen e sotme në qendër të Elbasanit i ka marrë jetën avokatit Ravik Gurra.
Gurra nuk është emër i panjohur pasi ka mbrojtur disa nga çështjet më delikate, të cilat kanë pasur në qendër grupe të strukturuara kriminale.
Avokati ka mbrojtur “të fortin e Tiranës”, Emiljano Shullazin, i cili ka marrë edhe dënimin prej 14 vitesh burg vitin e shkuar për veprën penale “shtrëngim për dhënie pasurie dhe grup të strukturuar kriminal. Mirëpo nuk përfundon me kaq.
Gurra gjithashtu ka mbrojtur edhe anëtarët e familjes Çapja, e cila njihet edhe si një nga bandat më të strukturuara të Elbasanit, e akuzuar për një sërë ngjarjesh të ndodhura në qytet, por ende pa u dënuar askush.
Një tjetër emër që i shtohet listës së të mbrojturve nga avokati ka qenë edhe Dashamir Xhika, ish- kreu i ARRSH-së ku në diskutim ka qenë çështja për rrugën e Gjinarit.
Dhe për ta përmbyllur disi, një tjetër emër, Altin Arapi, i akuzuar dhe dënuar me burgim të përjetshëm nga autoritetet shqiptare për vrasjen e shoferit të Prokurorit të Përgjithshëm Theodhori Sollaku, i cili e çoi çështjen deri në Gjykatën e Strasburgut ku avokati mbrojtës ka qenë pikërisht Gurra.
