E dashura e Safet Bajrit, shtetasja E.A, ka kundërshtuar vendimin për masën e sigurisë “arrest me burg”, duke e apeluar atë në Gjykatën e Posaçme të Apelit.
Ajo akuzohet për veprën penale të “përkrahjes së autorit të krimit”, ndërsa avokati i saj ka argumentuar se provat e paraqitura nga SPAK nuk janë të mjaftueshme për ta mbajtur në paraburgim.
Sipas hetimeve, E.A dyshohet se ka ndihmuar Safet Bajrin dhe Astmer Bilalin në vrasjen e Fatbardh Licit, e cila ndodhi në Shkodër në vitin 2018. Megjithatë, gjatë seancës për shqyrtimin e masës së sigurisë, ajo ka mohuar çdo përfshirje në këtë ngjarje, duke pohuar se në ditën e vrasjes ndodhej në Tiranë dhe jo në Shkodër.
Për të njëjtën çështje, edhe Safet Bajri, Astmer Bilali dhe Behar Bajri kanë apeluar vendimin e gjykatës, duke kërkuar rishqyrtimin e masave të tyre të sigurisë.
