Kryetari i Komisionit të Prokurimit Publik, Jonaid Myzyri, është paraqitur këtë të hënë në ambientet e SPAK, ku pritet t’i komunikohet zyrtarisht akuza ndaj tij. Ai është shoqëruar nga avokati i tij, Ermir Beta.
Më 24 qershor, SPAK e ka marrë Myzyrin të pandehur për dy vepra penale: “Shkelje e barazisë në tenderë” dhe “Shpërdorim detyre”, në lidhje me tenderin për mirëmbajtjen e segmentit rrugor Shpal–Ura e Repsit, me gjatësi 58.7 kilometra dhe vlerë 2.29 milionë euro.
Për të njëjtën çështje, pritet që akuzat të komunikohen edhe ndaj tre anëtarëve të tjerë të Komisionit të Prokurimeve Publike, të përfshirë në shqyrtimin e ankesave nga subjektet private.
Të gjithë akuzohen për “Shkelje të barazisë në tenderë”, me fokus abuzimet e dyshuara në procedurat për mirëmbajtjen e rrugës “Rrëshen–Shpal” dhe “Shpal–Ura e Repsit”.
