Me përfundimin e numërimit të votave të zgjedhjeve të 11 majit, është përmbyllur edhe përbërja e Parlamentit të ri.
Partia Socialiste e Edi Ramës renditet me 83 mandate, ndërsa koalicioni PD-ASHM ka siguruar 50 deputetë. Partia Socialdemokrate merr 3 mandate, Mundësia 2, ndërsa ‘Nisma Shqipëria Bëhet’ dhe ‘Lëvizja Bashkë’ fitojnë nga një mandat secila.
Kandidaturat për deputetë në listat e hapura kanë shkaktuar përplasje të forta, veçanërisht në qarqet Tiranë, Durrës dhe Shkodër, ku janë shfaqur edhe dyshime për manipulim të votave preferenciale.
Kandidatët janë nisur menjëherë për të kërkuar pamjet filmike të procesit të numërimit në Komisionin Qendror të Zgjedhjeve.
Në Durrës, kandidati i PD-ASHM, Aulon Kalaja, i cili mori rreth 8 mijë vota preferenciale, nuk arriti të marrë mandat, pasi në vend të tij u përzgjodh Arjan Ndoj, ish-prokuror dhe kandidat i opozitës, duke ngjallur dyshime për manipulim.
Në Kukës, Shkëlqim Shehu, i cili bazuar në votat brenda vendit do të duhej të merrte mandat, humbi për shkak të votave të diasporës që ndryshuan renditjen, duke i dhënë mandatin Isuf Çelës.
Edhe Ilir Alimenhmeti, kandidat i PD-ASHM në Tiranë, kërkon pamjet filmike, duke ngritur dyshime mbi veprimet e numëruesve, përfshirë përfaqësuesit e PD dhe socialistëve.
Po ashtu, Altin Goxhaj, një tjetër kandidat i listës së hapur të PD-së në Tiranë, pretendon se votat e tij janë humbur, veçanërisht në Njësinë Administrative 9, pranë shkollës Sami Frashëri.
Ilirjana Kuçana nga Durrësi gjithashtu ka kërkuar të shohë pamjet filmike të numërimit. Ndër kandidatët socialistë në Tiranë, Blerina Gjylameti dhe Xhemal Qefalia po ashtu kërkojnë verifikim, pasi kanë mbetur jashtë Parlamentit, duke humbur përballjet me Olta Xhaçkën dhe Ornaldo Rakipin.
Etilda Gjonaj, gjithashtu nga radhët e PS, ka kërkuar pamjet për të vërtetuar rezultatin.
Në Shkodër, Adnan Shullani dhe Frrok Gjini nga PS kanë ngritur dyshime për manipulim votash, ndërsa PS ka marrë 4 mandate në këtë qark.
Nga partitë më të vogla, Rajmond Dervishi i koalicionit ‘Euroatlantik’ me Lulzim Bashën është kandidati i vetëm që ka ngritur pretendime dhe ka kërkuar pamjet filmike për votat e subjektit dhe preferenciale.
Djathtas 1912, nën drejtimin e Enkelejd Alibeajt dhe në koalicion me LZHK të Dashamir Shehit, ka kërkuar gjithashtu pamjet filmike për votat në qarkun e Tiranës.
Po ashtu, demokratët e Sali Berishës dhe PL, pjesë e koalicionit PD-ASHM, pritet të paraqesin një seri kërkesash për verifikimin e procesit të numërimit të votave.
Në përgjithësi, procesi i numërimit ka nxjerrë në pah tensione dhe pretendime për manipulim në disa qarqe kyçe, ndërsa kandidatët vazhdojnë të kërkojnë transparencë dhe verifikim në KQZ.
