Dyndje në kufirin grek për përvjetorin e Kacifas, ndalohet ekstremisti Karathanos
Mbrëmjen e djeshme, kufiri me Greqinë është dyndur nga shtetasit grekë, të cilët do të marrin pjesë në ceremoninë mortore të Kostandinos Kacifas.
Antiterrori ka blinduar pikat kufitare me shtetin helen, për të kontrolluar personat e shpallur ‘non grata’, të cilët do të përpiqen të futen në tokën shqiptare.
‘Balkanweb’ shkruan se mbrëmjen e djeshme është ndaluar në Qafë-Botë, Harallamb Karathanos, i cili është me origjinë nga Dropulli.
Ky i fundit është shpallur ‘non grata’ nga Ministria e Jashtme shqiptare, për shkak të trazirave gjatë ceremonisë mortore të Kacifas.
Prej ditësh shoqatat patriotike greke, kanë bërë thirrje për grumbullimin e sa më shumë të rinjve.
Ndërkohë për të marrë pjesë në ceremoninë e Kacifas, janë mbledhur 1800 persona.
Gjatë mbrëmjes së djeshme kanë hyrë në territorin shqiptar 500 persona, ndërsa mëngjesin e sotëm është futur një autobus me 20 persona, ku dy shtetas të shpallur ‘non grata’ janë kthyer mbrapsh.
Kujtojmë këtu se Kostandinos Kacifas u vra më 28 tetor të 2018-ës, gjatë ditës së të rënëve të luftës italo-greke, në përleshje me forcat RENEA.
Kacifas më parë kishte terrorizuar fshatin Bularat, duke qëlluar me kallashnikov në ajër, ndërsa u bëri rezistencë edhe forcave të policisë.
