Shefja e Epidemiologjisë në Institutin e Shëndetit Publik, Silva Bino ka reaguar pas akuzave se dy persona kanë humbur jetën pasi morën vaksinën kineze Coronavac. Ky shqetësim u ngrit nga mjeku i njohur Erion Dasho i cili shkruante në Facebook-un e tij se për shkak të dy vdekjeve të papritura, duhej pezulluar përkohësisht vaskinimi me Coronavac.
Ndërkohë, Silva Bino ka thënë se nuk është vaksina shkak për humbjen e jetëve. Ajo u shpreh se vaksina të mbron nga Covid-19, jo nga sëmundjet e tjera. Më tej ajo ka shtuar se vaksinat janë të sigurta dhe se janë vlerësuar studimet e të dhënat përpara se ato të vinin në vendin tonë.
“Nuk është shkak i humbjeve të jetës vaksina. Vaksina anticovid të mbron nga covid19, jo nga semundjet e tjera. Vaksinat janë të sigurta sepse përpara marrjes së vaksinës në vendin tone, ka një seri dokumentash në një seri kriteresh, të cilat duhet të plotësohen. Ka edhe një komitet të ekspertëve për vaksinimin i cili i vlerëson të gjitha këto elemente dhe natyrisht kjo mbështetet në të gjitha të dhënat ndërkombëtare, në të gjitha vendet ku vaksinat janë përdorur në masë, në miliona njerëz edhe më tej nga studimet e publikuara”, deklaroi Bino.
Më herët mjeku Erion Dasho deklaronte në postimin e tij se e kishte investiguar personalisht njërin prej rasteve dhe se thirrja e tij nuk kishte qëllim të përhapte panik, por ishte thirrje për kujdes. Dasho shkruante se ishte i hapur për të komunikuar me përfaqësues të ministrisë për rastin që e kishte invesiguar vetë.
Postimi i plotë:
REKOMANDIM DREJTUAR MINISTRISË SË SHËNDETËSISË DHE ÇËSHTJEVE SOCIALE!
Për shkak të të paktën dy vdekjeve të papritura midis personave që kanë kryer vaksinën CoronaVac (një prej të cilave rast i investiguar personalisht që humbi jetën një ditë pas vaksinimit), i rekomandoj Ministrisë së Shëndetësisë, Komitetit të COVID dhe Komitetit të Imunizimit të pezullojnë përkohësisht fushatën e imunizimit me CoronaVac deri sa këto vdekje të investigohen dhe të provohen si të palidhura me vaksinën në fjalë.
Kjo thirrje nuk ka aspak qëllim të ngjallë panik dhe të dëmtojë një proces të dobishëm siç është imunizimi ndaj COVID. Thjesht është në përputhje me praktikat e mira ndërkombëtare të farmakovigjilencës.
Dy humbje jete midis rreth 50 mijë të vaksinuarve është një tregues që kërkon kujdes të jashtëzakonshëm!
Mbetem i hapur për të komunikuar me përfaqësues të ministrisë dhe komitetit lidhur me rastin që kam investiguar personalisht.
