Një murale përkujtimore është realizuar në Vlorë në nderim të dy të rinjve, Luan Llanaj dhe Tomor Mbrati, të cilët humbën jetën tragjikisht në një aksident me motor më 1 qershor.
Veprimi është ndërmarrë nga miq, shokë të klasës dhe të afërm të viktimave, të cilët kanë punuar për disa ditë me bojëra në vendin ku ndodhi aksidenti, duke e shndërruar atë në një pikë kujtese dhe reflektimi.
Të dy të rinjtë ishin nxënës të shkollës profesionale “Pavarësia” në Vlorë dhe njëkohësisht punonin në një servis për të ndihmuar familjet e tyre. Motori me të cilin po udhëtonin ishte blerë me rrogën e parë nga puna e tyre.
Aksidenti ndodhi rreth orës 13:40, në afërsi të një karburanti në rrugën “Demokracia”, në aksin Vlorë–Fier, në zonën e njohur si “Pusi i Mezinit”.
Sipas të dhënave, shoferi i motorit humbi kontrollin duke u përplasur fillimisht me një shtyllë elektrike dhe më pas me një tjetër prej druri.
Goditja ishte fatale për Luanin, i cili ndërroi jetë në vend, ndërsa Tomor Mbrati u transportua fillimisht në spitalin e Vlorës dhe më pas në Tiranë, por nuk arriti të mbijetonte.
Njëri prej tyre jetonte vetëm me nënën dhe mbante barrën financiare të familjes. Të dy kujtohen si djem të urtë, të përkushtuar në punë, me aftësi të mira profesionale dhe pa precedentë problematikë.
Sot, në vendin ku humbën jetën, gjenden ende lule dhe qirinj, si dëshmi e dhimbjes dhe dashurisë që lanë pas.
