Ditën e djeshme, fshatin Gruemirë në Malësinë e Madhe e tronditën dy ngjarje të njëpasnjëshme, të realizuara nga të njëjtët autorë.
Dy persona të maskuar, mëngjesin e djeshëm, iu afruan banesës së familjes Kurtaj dhe qëlluan me armë shoshë, kamerat e sigurisë të shtëpisë, pastaj u larguan drejt një zone malore.
Pas disa orësh, gjatë mbrëmjes, të njëjtët persona u rikthyen nga zona malore dhe u përballën me tre djemtë e familjes Kurtaj, të cilët i prisnin me një automjet. Mirsad, Besim dhe Edison Kurtaj nisën t’i ndiqnin autorët, të cilët, sapo kuptuan se po ndiqeshin, qëlluan me breshëri në tokë dhe në ajër.
Ndjekja zgjati rreth 10 minuta, deri në momentin kur njëri nga autorët u rrëzua nga motori, por arriti të largohej nëpër fushat e mbjella të fshatit.
Policia po vazhdon hetimet për zbardhjen e plotë të ngjarjes dhe identifikimin e autorëve.
