Presidentja Vjosa Osmani ka dhënë lajmin e mirë se dy qytetarët e Kosovës që ndodheshin në Kabul, janë të sigurt tashmë. Osmani është shprehur se më ndihmën e SHBA dhe Europës tashmë qytetarët kosovarë janë të sigurt dhe larg rrezikut të talebanëve. Presidentja ka theksuar se së shpejti ata do të kthehen në Kosovë.
” Për disa kohë, Ministria e Jashtme e Kosovës dhe Zyra ime kanë punuar në sigurimin e evakuimit të sigurt të qytetarëve të Kosovës nga Kabuli. Me ndihmën e Shteteve të Bashkuara dhe vendeve evropiane, dy qytetarë tanë u evakuuan me siguri në një vend të sigurt dhe do të kthehen së shpejti në shtëpi.”, ka shkruar Vjosa Osmani.
Sjellim në vëmendje se ditën e djeshme Ministria e Jashtme e Kosovës njoftoi se ishin identifikuar e lokalizuar tre qytetarë që kishin mbetur në Afganistan pas trazirave. Aktualisht janë evakuuar dy qytetarë, ndërsa një prej tyre nuk është evakuuar ende. Po ashtu edhe Shqipëria ka një qytetarë që ka ngelur në Kabul.
Kujtojmë se talebanët shpallën luftën në Afganistan të përfunduar, pasi morën nën kontroll pallatin presidencial në Kabul.
Rebelëve iu desh pak më shumë se një javë për ta arritur objektivin e tyre, pasi trupat ushtarake vendase, të stërvitura dhe të armatosura për 20 vjet nga Shtetet e Bashkuara dhe vende të tjera, dështuan.
Ndërkohë, trupat amerikane kanë marrë nën kontroll aeroportin ndërkombëtar të Kabulit, duke marrë në duar menaxhimin e trafikut ajror për të evakuuar stafin diplomatik të Shteteve të Bashkuara dhe aleatëve.
