Një sasi me lëndë plasëse ka shpërthyer në orët e para të mëngjesit të sotëm në butikun e Noizyt në pjesën e poshtme të ndërtesës, ndërsa lart lokal,në zonën e plepave në Durrës, i cili figuron në emër të babait të tij, Bashkim Rajku.
Burime bëjnë me dije se autori i vendosjes së lëndës plasëse ka qenë një mashkull, ndërkohë që nuk është bërë ende identifikimi i tij pavarësisht kqyrjes së kamerave të sigurisë.
Nga shpërthimi nuk raportohen dëmtime në njerëz, por ka dëme të konsiderueshme materiale. Ngjarja ka ndodhur rreth orës 04:00 të mëngjesit të sotëm.
Nga të dhënat e para, raportohet se nga shpërthimi janë dëmtuar xhamat në të dy katet e ndërtesës.
Njoftimi i policisë Durrës:
Më datë 08.06.2022, rreth orës 04:24, në lagjen Nr.13, në një ambient (butik rrobash) të marrë me qira nga shtetasi B.R., ka shpërthyer një sasi lënde eksplozive.
Si pasojë ka vetëm dëme materiale.
Grupi hetimor nën drejtimin e Prokurorisë vijon hetimet për zbardhjen e ngjarjes, identifikimin e kapjen e autorit/ve.
Kujtojmë se këto ditë Noizy së bashku me babain e tij Bashkim Rajku u përfshi në një konflikt me Kleviol Ahmetin, video që u bë virale në rrjet për shkak të dhunës dhe përleshjes mes tyre. Dyshohet që lënda eksplozive të jetë vendosur në shenjë hakmarrje sipas një burimi hetimor. Megjithatë po hetohet edhe në pista të tjera.
