Doktor Dhimitër Kraja, apo i njohur nga kolegët e tij si Luli, 2 ditë më parë la Spitalin Infektiv ku ishte i shtruar prej ditësh pasi u infektua nga COVID-19.
Kraja kishte disa vite që kishte dalë në pension, pas 48 vitesh punë në këtë spital, por me mbërritjen e koronavirusit në Shqipëri ai vendosi të rikthehej për të ndihmuar kolegët.
Mirëpo, doktori u prek nga virusi të cilin donte ta luftonte, por fatmirësisht ia doli të shërohej dhe tashmë gëzon shëndet të plotë.
Por, ditën e sotme ministrja e Shëndetësisë, Ogerta Manastirliu, ka lajmëruar se Kraja nuk ka ndërmend të dorëzohet, pasi do rikthehet sërish krah kolegëve deri në fund të betejës me COVID-19.
Në një lidhje me Skype për News 24, Manastirliu siguroi se doktori është në një gjendje shumë të mirë shëndetësore dhe se do vendoset sërish në vijën e parë të luftës.
‘Doktor Kraja ka dalë nga spitali dhe është në shtëpi në gjendje shumë të mirë. Por, do rikthehet sërish në Spitalin Infektiv, në ndihmë të kolegëve.”- tha ministrja.
Ky është padyshim një gjest shumë fisnik nga ana e Krajës, i cili ka vërtetuar edhe një herë sa humanitar është profesioni i mjekëve, që gjatë pandemisë kanë treguar se janë heronjtë e vërtetë.
Koronavirusi nuk është treguar i mëshirshëm as me bluzat e bardha pasi në gjithë botën ka regjistruar shumë viktima, teksa ka infektuar mijëra të tjerë.
