Qyteti i Durrësit është kthyer këto ditë në një skenë shumëngjyrëshe të kulturës dhe traditës, falë edicionit të 6-të të Festivalit Ndërkombëtar të Muzikës dhe Vallëzimit Folklorik.
Festivali mblodhi artistë, muzikantë dhe valltarë nga 10 vende të ndryshme, përfshirë Shqipërinë, Kosovën, Maqedoninë e Veriut, Turqinë, Bullgarinë, Rumaninë, Suedinë dhe Bosnje-Hercegovinën, të cilët sollën në skenë një mozaik të pasur me këngë, valle dhe ritme tradicionale.
Pjesëmarrësit u shprehën të entuziazmuar nga mikpritja dhe atmosfera festive që i karakterizoi netët e festivalit.
“Vij nga një fshat në Bullgari. Së bashku me motrën kemi sjellë këngët dhe vallet e zonës sonë. Ajo do të performojë me një instrument tradicional,” tregoi një nga pjesëmarrësit.
“Është hera e parë që vijmë në Shqipëri dhe jemi të mahnitur nga bukuritë dhe ngrohtësia e njerëzve. Është pak nxehtë për ne, por do të sjellim këngë tradicionale suedeze,” thanë dy artistë nga Suedia.
“Ne përfaqësojmë Durrësin dhe jemi për herë të katërt pjesë e këtij festivali. Ndihemi krenarë për këtë,” u shprehën përfaqësuesit shqiptarë.
Ky edicion i festivalit synon promovimin dhe ruajtjen e trashëgimisë folklorike të vendeve pjesëmarrëse. Përmes shkëmbimit kulturor, festivali ka kaluar përtej kufijve gjeografikë dhe ka afruar komunitete të ndryshme në një atmosferë të gjallë bashkëpunimi dhe diversiteti.
Për shumë vizitorë dhe banorë, ky aktivitet po shihet si një shtysë e re për t’i dhënë Durrësit jo vetëm profilin e një destinacioni turistik bregdetar, por edhe atë të një qendre të rëndësishme kulturore dhe ndërkombëtare.
