Gjatë patrullimeve rutinë për garantimin e rendit dhe sigurisë publike, shërbimet e Policisë në Durrës kanë ndërhyrë menjëherë për të parandaluar përshkallëzimin e një konflikti mes disa shtetasve në një lokal në lagjen nr. 13.
Patrulla e Përgjithshme ka arrestuar në flagrancë një 35-vjeçar, G.V., i cili u kap me një armë zjarri tip kallashnikov.
Arma e zjarrit është sekuestruar menjëherë dhe arrestimi është bërë në kuadër të operacionit policor të koduar “Momentum”. Sipas Policisë, konflikti kishte nisur për motive të dobëta dhe ndërhyrja e shpejtë e efektivëve ka parandaluar një ngjarje të mundshme të rëndë me pasoja të rënda.
35-vjeçari akuzohet për veprën penale “Mbajtja pa leje dhe prodhimi i armëve, armëve shpërthyese dhe i municionit”.
Grupi hetimor, nën drejtimin e Prokurorisë së Durrësit, ka nisur hetimet për zbardhjen e plotë të rrethanave të ngjarjes.
Materialet procedurale i janë dorëzuar prokurorisë për veprime të mëtejshme.
