Pas dhunës së ushtruar ndaj kolegut të tyre Gerald Koka dy ditë më parë, mjekët e Spitalit të Durrësit kanë dalë në protestë.
Kujtojmë se mjeku Koka u godit nga dy pacientë të përfshirë në sherr me njëri-tjetrin ndërsa ushtronte detyrën e tij.
Pacientët e dehur mësohet se u konfliktuan në urgjencën e spitalit të Durrësit dhe mjeku i turnit u përpoq t’i ndajë, por njëri prej tyre e ka goditur me tullë në fytyrë. Fatmirësisht mjeku ndodhet jashtë rrezikut për jetën.
Paraditen e sotme mjekët protestuan jashtë ambienteve të spitalit të Durrësit duke kërkuar mbrojtje 24 orë me policë.
“Kërkojmë të rriten masat e sigurisë në spital dhe në shërbimin e urgjencës. Do të donim të ishte e pranishme policia e shtetit 24 orë, të paktën në shërbimin e urgjencës, në mënyrën që edhe ne ta kryejmë detyrën e qetë ndaj pacientëve. Ne vëmë theksin tek rritja e sigurisë në ambientin e urgjencës. Kërkojmë të sigurohemi, të mbrohemi sepse po ushtrohet dhunë çdo ditë nga qytetarët kundrejt mjekëve. Mjeku është aset dhe duhet mbrojtur. Iu bëj thirrje që të mbrohemi sepse as në kohë lufte bluzat e bardha nuk preken. Ne jemi për shërbim dhe jo për tu dhunuar“-thanë mjekët për mediat.
