Në Ditën Ndërkombëtare të Gruas, në Durrës u zhvillua një marshim që theksoi rëndësinë e të drejtave dhe fuqizimit të grave si shtylla kryesore e familjes dhe shoqërisë.
Marshimi nisi nga Gjykata e Durrësit dhe vijoi përgjatë bulevardit dhe shëtitores “Taulantia”, duke angazhuar qytetarët në mbështetje të barazisë dhe drejtësisë sociale për gratë.
Aktivistët theksuan nevojën për mundësi të barabarta dhe masa më të forta kundër dhunës me bazë gjinore.
Dhuna në familje mbetet një problem shqetësues në qytet. Gjatë vitit të kaluar, u dhanë 471 urdhra të menjëhershëm mbrojtjeje, ndërsa vetëm në dy muajt e parë të këtij viti janë lëshuar 75 të tillë, me rreth 330 procedime penale të hapura për raste të dhunës në familje.
Pjesëmarrëset ngritën zërin për më shumë siguri dhe respekt për gratë, duke kërkuar një shoqëri më të drejtë dhe të ndërgjegjshme për rolin e tyre të pazëvendësueshëm.
