Durim Bami, i njohur si “i forti i Niklës,” vijon të mbahet i arrestuar në Dubai, ku po zhvillon një betejë intensive për të parandaluar ekstradimin drejt Shqipërisë.
Autoritetet shqiptare po kërkojnë me çdo kusht kthimin e tij për të përballur akuzat e ngritura nga SPAK për krijim të kushteve për vrasje dhe pjesëmarrje në grup të strukturuar kriminal.
Bami u arrestua fillimisht në Emiratet e Bashkuara Arabe, por më pas u lirua për shkak të mungesës së një marrëveshjeje ekstradimi mes dy vendeve.
Megjithatë, ai u ndalua sërish papritmas në Dubai, teksa ndodhej me familjen, dhe prej më shumë se një muaji e gjysmë po mbahet në paraburgim.
Avokatët e tij kanë siguruar dosjen hetimore të SPAK, ku ai figuron si i dyshuar për disa vepra penale dhe njëkohësisht si objektiv i grupeve kriminale, përfshirë atë të ish-deputetit socialist Arben Ndoka, i cili e akuzon për përfshirje në vrasjen e vëllait të tij, Aleksandër Ndoka.
Rasti i Bamit po trajtohet me kujdes nga drejtësia në Dubai, duke pasur parasysh precedentët e mëparshëm, si deportimi i Plarent Dervishajt në Shqipëri. Burime nga autoritetet kanë konfirmuar se seanca e radhës për çështjen e tij do të mbahet më 24 dhjetor, ku pritet të vendoset për fatin e tij.
