Gjatë kësaj jave u hap zyrtarisht “Fshati i festave” në Sheshin Skënderbej për të vazhduar traditën e këtyre viteve të fundit. Në shesh janë vendosur sërish shtëpizat e vogla prej druri, në të cilat biznese të ndryshme reklamojnë dhe shesin shërbime për qytetarët. “Fshati i festave” do të qëndrojë hapur deri në fillim të janarit dhe për javë të tëra aty mblidhen grumbuj njerëzish për ta vizituar.
Pavarësisht se grumbullimet janë të ndaluara për shkak të pandemisë, duket se për këtë rast nuk përbën problem. Nga ana tjetër Panairi i Librit, që ka thuajse të njëjtën formë organizimi, përjashtuar faktit që mbahet zakonisht në ambiente të hapura, është konsideruar si event i rrezikshëm për prhapjen e Covid-19. Kjo gjë ka nxitur edhe reagimin e ashpër të disa qytetarëve, të cilët nuk arrjnë të kuptojnë se si lejohet një panair i tillë, që ka në qendër ushqimet, ndërsa panairi i librit u anulua dhe do të zhvillohet online.
Fushatë online kundër “Fshatit të festave”: Duam libra, jo qofte!
“Shpërndaje!
Ne, njerëzit që lexojmë libra, nisur nga lejimi i Panairit të Produkteve të Tiranës (produkte për të mbushur barkun) dhe njëkohësisht anulimit të Panairit të Librit, anulimit me ligj të çdo forme tubimi dhe shumë aktiviteteve të tjera, edhe ecjes me standarde të dyfishta sipas interesave, nisim fushatën online #duamlibrajoqofte. Kush e ndjen veten të cunguar, të mashtruar, të ofenduar, të rrezikuar nga injoranca strategjike që po na imponohet me ngulm, le ta shpërndajë këtë status.
#duamlibrajoqofte #duamteatër #duamkulturë #libriështënevojë #joinjorancë #mbushnimendjenjobarkun #bashkiaeturpit #qeveriaemarres #injorancastrategjike”. Kjo është një deklaratë që po shpërndahet me shpejtësi në rrjet nga të gjithë ata që janë kundër “Fshatit të festave”, i cili po cilësohet me ironi si “Panairi i qofteve”.
Ndër të parët që reagoi kundër kësaj çështje ishte gazetari, Enkel Demi, i cili njihet me pseudonimin Tom Kuka nga librat që ka shkruar.
“Një vend që e bën panairin e birrës për së mbari dhe panairin e librit online, besoj se të ardhmen ka me e pas me shkumë”, ka shkruar Demi në rrjete sociale.
Panairi i Librit online përhap Covid-19, ndërsa “Fshati i Festave” jo!
Ministria e Shëndetësisë e cilësoi Panairin e Librit si një event të rrezikshëm për përhapjen e koronavirusit, ndaj u vendos që ai të mbahet online. Të gjithë botuesit shqiptarëë e kanë cilësuar këtë gjë si një sfidë të madhe për ta e lexuesit dhe ende nuk ka një plan të mirëfilltë se si do të mbahet Paniri i Librit online.
Deri më tani dihet se do të ketë një platformë online për blerjen e librave dhe disa ekrane të mëdhenj nëpër kryqytet që do të pasqyrojnë eventet që do të organizohen, por gjërat nuk janë ende shumë të qarta.
Panairi i Librit do të zgjasë vetëm 4 ditë (12-15 nëntor), ndërkohë që “Fshati i Festave”, ku mblidhen mijëra njerëz çdo ditë, do të zgjasë plot dy muaj. Si ka mundësi që ky i fundit nuk është i rrezikshëm për përhapjen e Covid-19, ndërsa Panairi i Librit është? A nuk mundej që Panairi i Librit të zhvillohej në një ambient të hapur njësoj si “Fshati i festave”? Sigurisht që mundej, por rregullat në vendin tonë ndryshe shkruhen e ndryshe zbatohen kur vjen puna tek interesat e pushtetit!/Iconstyle.al.
