Ukraina është goditur sërish herët në mëngjes nga një tjetër sulm masiv ajror rus, i cili ka lënë të paktën 12 persona të vdekur.
Njëkohësisht, dronë ukrainas detyruan mbylljen e përkohshme të disa aeroporteve në Moskë, pak orë përpara shkëmbimit të planifikuar të të burgosurve mes dy vendeve.
Ky është sulmi i dytë radhazi në shkallë të gjerë ndaj Ukrainës. Forcat Ajrore Ukrainase raportuan se natën mes së premtes dhe së shtunës ishin përdorur rreth 250 dronë dhe 14 raketa balistike, me shumicën e tyre që kishin në shënjestër Kievin.
Në një deklaratë në Telegram, shërbimet e emergjencës e përshkruan natën në rajonin e Kievit si një “natë terrori”, ku humbën jetën katër persona dhe u plagosën 16 të tjerë, përfshirë tre fëmijë.
Në rajonin jugor të Mykolaiv, një goditje me dron në një ndërtesë pesëkatëshe shkaktoi zjarr, duke lënë një të vdekur dhe pesë të plagosur.
Sulme me pasoja të rënda janë raportuar edhe në Khmelnytskyi, në perëndim të vendit, ku katër persona humbën jetën dhe pesë të tjerë u plagosën, sipas autoriteteve lokale.
Në Kiev, autoritetet raportuan mbi dhjetë dronë rusë të zbuluar mëngjesin e sotëm. Gazetarë të AFP-së kanë dëgjuar shpërthime në kryeqytet, ndërsa alarmet e sulmit ajror u aktivizuan në të gjithë vendin pas lëshimit të raketave lundruese.
Ministria ruse e Mbrojtjes deklaroi se kishte kapur ose shkatërruar 95 dronë ukrainas brenda katër orëve. Sipas kryebashkiakut të Moskës, Sergei Sobyanin, dymbëdhjetë dronë ishin interceptuar në rrugë drejt kryeqytetit rus.
