Ditët e fundit Rusia ka përdorur disa dronë të blerë nga Irani për të shkatërruar pika strategjike për Ukrainën. Ambasadorja amerikane në Shqipëri Yuri Kim ka deklarurar se “Rusia ka blerë UAV nga Irani në kundërshtim me rezolutën 2231 të Këshillit të Sigurimit të OKB-së. Këto UAV po përdoren për të goditur civilët ukrainas dhe infrastrukturën civile kritike”.
Ajo ka shpërndarë një deklaratë të DASh në lidhje me këta dronë kamikazë që kanë sulmuar civilët në Ukrainë.
“Sot, Shtetet e Bashkuara iu bashkuan Mbretërisë së Bashkuar dhe Francës në ngritjen e çështjes së transferimit të UAV-ve nga Irani në Rusi në një takim të Këshillit të Sigurimit të OKB-së, ku anëtarët e Këshillit morën informime ekspertësh nga Sekretariati i OKB-së mbi raportet e transferimit të këtyre armëve të rrezikshme.. Ne shprehëm shqetësimet tona të rënda për blerjen nga Rusia të këtyre UAV-ve nga Irani në kundërshtim me rezolutën 2231 të Këshillit të Sigurimit të OKB-së”, deklaroi DASH.
Sipas deklaratës, Shtetet e Bashkuara ka paralajmëruar që në korrik për këtë marrëveshje midis Rusisë dhe Iranit për këta dronë të cilët po përdoren këto ditë në Ukrainë.
“Ndërsa Irani vazhdon të gënjejë dhe të mohojë ofrimin e armëve Rusisë për përdorim në Ukrainë, ne jemi të përkushtuar të punojmë me aleatët dhe partnerët për të parandaluar transferimin e armëve të rrezikshme në Rusi. Ne nuk do të hezitojmë të përdorim sanksionet tona dhe mjete të tjera të përshtatshme për të gjithë të përfshirët në këto transferime. Ne gjithashtu do të vazhdojmë të shtojmë ndihmën e paprecedentë të sigurisë për Ukrainën, duke përfshirë aftësitë e mbrojtjes ajrore, në mënyrë që Ukraina të mund të mbrohet nga këto armë”, ka theksuar DASH.
