Administrata e Bashkisë së Tiranës ka braktisur orarin zyrtar të punës, duke u angazhuar në mbështetje të kryebashkiakut Erion Veliaj, i cili ndodhej në seancë gjyqësore për masën e rivlerësimit.
Të gjithë punonjësit e Njësisë Bashkiake nr. 9 janë mobilizuar dhe u paraqitën para Gjykatës së Posaçme për të protestuar, duke lënë zyrat të mbyllura dhe qytetarët pa shërbime publike.
Në protestë ishin të pranishëm jo vetëm punonjës të administratës bashkiake, por edhe ish-drejtues të Policisë Bashkiake, të shoqëruar nga militantë të tjerë socialistë.
U shfaqën gjithashtu zyrtarë të tjerë të administratës së Veliajt, si ish-drejtori i Policisë Bashkiake, Ermal Kapllani, dhe Drejtori i Shërbimeve Mbështetëse, Syl Ismailaj. Ata ishin të pranishëm për të bërë presion mbi vendimmarrësit në lidhje me masën e sigurisë ndaj kryebashkiakut.
Protesta u ndërpre përkohësisht për t’u rinisur në orën 13:30, pasi avokatët e Veliajt kërkuan kohë për të njohur dosjen.
Veliaj është arrestuar për akuza korrupsioni dhe pastrim parash dhe ndodhet në burg. Gjatë protestës, një qytetare iu drejtua punonjësve të bashkisë, duke i quajtur të turpëruar për mbrojtjen e një të akuzuari për korrupsion, duke komentuar edhe për luksin e jetës së Veliajt dhe shpenzimet e tij për gruan.
Videoja e qytetares është shpërndarë nga Sali Berisha, kreu i Partisë Demokratike, i cili kritikon administratën për mbrojtjen e korrupsionit dhe përfshirjen e saj në këtë protestë të organizuar.
