Avokati Radovan Çela është vetëdorëzuar sot në Policinë e Tiranës, pas një periudhe në kërkim në kuadër të dosjes “Zarka”.
Gjykata e Posaçme kishte veçuar më 20 shkurt çështjen për ish-kryeprokurorin e Vlorës, Aurel Zarka, nga të pandehurit e tjerë ende në kërkim, duke pranuar kërkesën e SPAK për kalimin e tij në gjykim.
Zarka akuzohet për korrupsion dhe ushtrim ndikimi të paligjshëm, ndërsa emri i tij doli nga zbërthimi i aplikacionit Sky ECC.
Për tre të pandehurit e tjerë ish-oficeren e BKH-së Erjona Dautaj, avokatin Radovan Çela dhe Astrit Vladi – çështja u pezullua për një vit, pasi ata nuk ishin arrestuar ende.
Çela ka shërbyer si përfaqësues ligjor i kushërinjve Alfred dhe Elvis Vladi, të lidhur me dosjen “Toyota Yaris”, ku në vitin 2018 u sekuestruan 3.4 milionë euro në Portin e Durrësit.
Prokuroria i akuzoi ata për krijimin e një organizate me qëllim pastrimin e parave me origjinë kriminale, por kushërinjtë Vladi nuk u arrestuan asnjëherë.
Ish-kryeprokurori i Vlorës, Aurel Zarka, u arrestua më 29 korrik 2024 me urdhër të SPAK dhe vendim të GJKKO-së. Sipas hetimeve, ai dhe të tjerët dyshohet se kanë ndërhyrë në disa çështje penale, duke dhënë dhe marrë ryshfet për ndikim tek funksionarë të drejtësisë.
Katër prej këtyre çështjeve lidhen me dosjen “Toyota Yaris”, e cila fillimisht u hetua nga Prokuroria e Krimeve të Rënda dhe më pas nga Gjykata e Tiranës, duke përfshirë edhe hetime pasurore ndaj të akuzuarve.
Hetimet kanë zbuluar komunikime të koduara në Sky ECC dhe EncroChat, ku Zarka përdorte katër llogari të ndryshme për të komunikuar me Dautajn dhe të tjerë.
Ai dyshohet gjithashtu se ka tentuar të ndikojë në hetimin pasuror ndaj Suel Çelës, nisur nga operacioni “Forca e Ligjit”, duke ushtruar presion mbi prokurorët e SPAK./ Dosja.al
