Ish-kryeministri Sali Berisha gjatë një konference për mediat nga selia e Partisë Demokratike deklaroi se disponon dokumente që lidhin politikanë të lartë të vendit me dosjen e njohur si “Toyota Yaris”.
Ai paralajmëroi se do të bëjë publike këto dokumente, të cilat, sipas tij, përmbajnë informacione të rëndësishme dhe komprometuese për disa figura të larta shtetërore.
Gjithashtu, kreu i PD akuzoi se ai u mbajt qëllimisht i izoluar dhe në arrest shtëpie, siç shtoi, për të mos dalë të vërtetat për disa nga çështjet e bujshme që janë në hetim.
“Gjithçka disponon Sali Berisha, do të ua paraqesë ju. Po kam dokumente për politikanë të lartë, direkt të implikuar dhe unë do t’i paraqes para jush. Unë ju thashë, sepse shumë e drejtë pyetja e shtruar. Pse e quan Skapin organizatë kriminale, është gjë shumë e rëndë, apo s’është. Nuk mund ta quaja kurrë nëse nuk do të kisha ato dokumente. Nuk shkon. Kurse ai është kreu i një organizate kriminale se fle mbi to. Fle mbi to se e kanë kapur mat me Ymer Lalën, për arsye se Luftar Reçi e ka denoncuar Ymer Lalën për vrasje dhe zotëria e tij në 19 pyetje si ka bërë asnjë pyetje për vrasjen dhe e ka ekzauruar nga vrasja. Pra ata që menduan se duke më ndryrë mua në arrest në shtëpi, do të mund të shpëtonin nga të vërtetat, tani do të përvëlohen prej tyre”, u shpreh Berisha.
