Në Gjykatën e Posaçme ka nisur seanca paraprake për kryedemokratin Sali Berisha dhe katër të pandehurit e tjerë, të akuzuar në lidhje me çështjen e ish-kompleksit “Partizani”.
Sipas raportimeve, gjatë seancës do të vijojnë argumentet mbrojtëse të avokatëve të Jamambër Malltezit, i cili ndodhet nën arrest shtëpie, si dhe të biznesmenit Fatmir Beltashi dhe dy të akuzuarve të tjerë.
Po ashtu, pritet të dëgjohen edhe përfaqësuesit ligjorë të shoqërive Homeplan shpk dhe Kontakt shpk.
Ndërkohë, as Berisha dhe as Malltezi nuk janë të pranishëm në sallë, por përfaqësohen nga avokatët e tyre. Seanca pritet të zgjasë deri në orën 16:00, kur përfundon edhe orari zyrtar i gjykatës.
Në fund të vitit të kaluar, Gjykata e Apelit vendosi që masa e sigurisë ndaj Berishës të ndryshohej nga “arrest shtëpie” në “detyrim për t’u paraqitur në policinë gjyqësore”.
Megjithatë, Apeli paralajmëroi se nëse ai nuk respekton këtë detyrim, SPAK mund të kërkojë një masë më të rëndë sigurie.
