GJKKO ka vendosur të shtyjë për më 19 maj, në orën 11:30, seancën për dosjen “Partizani”, ku ndër të akuzuarit është edhe ish-kryeministri Sali Berisha.
Çështja lidhet me privatizimin e ish-kompleksit sportiv të klubit Partizani, një proces që ka qenë objekt hetimi për dyshime mbi korrupsionin dhe shkeljen e ligjit. Në këtë dosje janë nën akuzë Berisha dhe dhëndri i tij, Jamarbër Malltezi.
Avokati i Berishës, Genc Gjokutaj, u shpreh për mediat se mbrojtja kishte kërkuar revokimin e vendimit të gjyqtares Flojera Davidhi, e cila më parë kishte rrëzuar të gjitha kërkesat për pavlefshmëri të akteve hetimore — kërkesë që u refuzua sërish nga trupa gjykuese.
“Sot ishte seanca ku ne vijmë nga një rrëzim kërkese për përjashtimin e gjyqtares, Flojera Davidhi, një vendim i çuditshëm, ku kërkesa është bërë nga ne avokatët dhe është gjobitur zoti Berisha pa pasuri firmën e tij. Është gjobitur me 10 mijë lekë të reja.
Ndërkohë që nuk është ai firmëtari i kërkesës. Kjo është një lajthitje e gjykatës. Ne sot vazhduam, i dhamë mundësinë kësaj gjykatë që të revokonte vendimin për pavlefshmëri që ne kemi ngritur, për ta sjellë këtë proces në shina, por gjyqtarja e rrëzoi këtë kërkesë. Ne njoftuam gjykatën që do bëjmë kërkesë për pavlefshmërinë e gjithë vendimmarrjes së Irena Gjokës, sepse ne kemi vendimin e gjykatës greke për dënimin e saj.
Edhe këtë kërkesë, pavarësisht se ne kërkuam kohë për ta formalizuar këtë kërkesë, ajo e rrezon. Mbi këtë bazë kemi kërkuar një përjashtim tjetër. Për të marrë vendimin e përjashtimit të gjyqtares Irena 2, ne na u dha koha dhe seanca u caktua në datën 19 maj në orën 11:30”, tha avokati.
