Prokuroria e Posaçme ka dorëzuar këtë të mërkurë aktet hetimore për kryebashkiakun e Tiranës, Erion Veliaj, i cili ndodhet i arrestuar në Burgun e Durrësit. Sipas informacionit zyrtar, dosja e përgatitur nga SPAK përmban rreth 61 mijë faqe dhe i është dorëzuar Veliajt për t’u njohur me materialet hetimore.
Hetimet ndaj kryebashkiakut kanë përfunduar dhe çështja është dërguar për gjykim në Gjykatën e Posaçme të Shkallës së Parë. Në dosjen e përgatitur nga SPAK përfshihen gjithsej 13 akuza që rëndojnë mbi Erion Veliajn dhe 12 akuza ndaj bashkëshortes së tij, Ajola Xoxa.
Sipas përfundimeve të hetimeve paraprake, Veliaj dhe Xoxa dyshohet se kanë bashkëpunuar mes tyre në nëntë episode të veçanta për të përfituar në mënyrë të parregullt shuma monetare dhe pasuri të paluajtshme. Këto përfitime, sipas hetuesve, janë marrë nga subjekte tregtare dhe organizata jofitimprurëse që më pas kanë marrë leje ndërtimi dhe fonde publike nga Bashkia e Tiranës.
Nga hetimi penal janë mbledhur të dhëna që, sipas SPAK, tregojnë se Veliaj, në cilësinë e kryetarit të Bashkisë Tiranë, ka firmosur miratimin e shpërndarjes së fondeve, të cilat më pas kanë përfunduar tek organizatat jofitimprurëse të kontrolluara nga bashkëshortja e tij dhe persona të afërt me të.
Prokuroria thekson gjithashtu se për shkak të funksionit që ushtronte Veliaj, të pandehurit kanë përfituar edhe pasuri të paluajtshme me vlerë të konsiderueshme nga subjekte tregtare që kishin marrë fonde publike dhe leje ndërtimi nga Bashkia e Tiranës.
Në të gjitha këto episode, sipas hetimit, Veliaj dhe Xoxa në bashkëpunim me njëri-tjetrin kanë konsumuar elementët e veprës penale të parashikuar nga neni 260 i Kodit Penal. Ndërsa shoqëritë tregtare dhe organizatat jofitimprurëse që dyshohet se kanë dhënë përfitime të parregullta për shkak të detyrës që ushtronte Veliaj, akuzohen për veprën penale të parashikuar nga neni 245 i Kodit Penal.
