Prokuroria e Posaçme Kundër Korrupsionit dhe Krimit të Organizuar (SPAK) ka nisur letërporosi në Francë dhe në Belgjikë për të zbardhur identitetet e personave që fshihen pas kodeve të përdorira në aplikacionin SKY ECC nga persona që kanë zhvilluar bseda për dosjen e “Toyota Yaris” të 3,4 milion eurove që u sekuestruan në Portin e Durrësit në vitin 2018.
Kërkesa e SPAK vjen pas vijimit të hetimeve në lidhje me këtë dosje dhe pas arrestimit të ish-kreut të Prokurorisë Vlorë, Aurel Zarka. Dyshimet janë që në të njëjtën çështje janë të përfshirë edhe të tjerë zyrtarë apo ish-zyrtarë.
Zarka është lënë në burg. Ai akuzohet për ndërhyrje të paligjshme dhe ndikim te gjyqtarët e prokurorët për 8 çështje gjyqësore, mes tyre dhe dosja e “Toyota Yaris”. Bashkë me Zarkën u lëshuan tre urdhërarreste për magjistraten Erjona Dautaj, avokatin Radovan Çela si dhe biznesmenin Astrit Vladi, të cilët nuk u ekzekutuan pasi të tre ndodhen jashtë shtetit.
Sipas SPAK, Kryeprokurori ka ndikuar në katër raste për lehtësim të hetimeve të dosjes “Toyota Yaris”, që nga një hetim për grup kriminal dhe pastrim parash prej 3.4 milionë euro u mbyll me një të dënuar, për mosdeklarim të të ardhurave në kufi.
