Seanca gjyqësore për çështjen e njohur si “Dosja 5D” është shtyrë sërish, këtë herë për shkak të mosformimit të plotë të trupës gjykuese.
Shkak për shtyrjen është bërë mungesa e gjyqtarit Erjon Bani, i cili ndodhet në një trajnim të planifikuar më parë.
Fillimisht, pjesë e trupës ka qenë gjyqtarja Elsa Ulliri, e cila u tërhoq nga çështja për shkak të njëanshmërisë së mundshme, pasi kishte shqyrtuar më parë kërkesa procedurale të lidhura me këtë dosje.
Ajo u zëvendësua nga gjyqtari Bani, i cili nuk ishte i pranishëm në seancën e fundit.
Aktualisht, trupa gjykuese përbëhet nga kryesuesja Flora Hajredinaj dhe anëtarja Flojera Davidhi.
Pritet që seanca e radhës të caktohet vetëm pasi të jetë siguruar prania e plotë e të tre anëtarëve të trupës.
“Dosja 5D” lidhet me hetimet e SPAK ndaj disa ish-zyrtarëve të Bashkisë së Tiranës, për abuzime me tendera. Më 2 korrik 2024, SPAK komunikoi zyrtarisht akuzat për Redian Mollën dhe Mariglen Qaton për “korrupsion pasiv” dhe “mosdeklarim të pasurisë”, ndërsa për Taulant Tushen akuzën për “shkelje të barazisë në tendera”.
Të tre u arrestuan në mars të vitit 2023 dhe u lanë në masën “arrest në burg”, ndërsa pesë të tjerë u hetuan në gjendje të lirë me masën “detyrim paraqitje”: Enton Punavija, Julian Zanaj, Albano Janku, Nestor Muhamellari, Deborah Keçi dhe Englatina Zere.
Sipas hetimeve të SPAK, Mariglen Qato dhe Redian Molla rezultojnë të jenë pronarë de facto të kompanisë “5D”, e cila ka fituar 11 tendera në periudhën 2016–2022 pranë Bashkisë Tiranë.
Kompania, sipas dosjes hetimore, operonte edhe nën emrat “Igor Electric” dhe “Vas Construction”.
