Figura kryesore e opozitës ruse Alexei Navalny ka njoftuar se po i jep fund grevës së tij të urisë pas 24 ditësh që ka refuzuar të ushqehet në burg. Disa orë më parë mjekët e tij privatë i kishin bërë thirrje që të merrte ushqim për të ruajtur jetën dhe shëndetin e tij.
Navalny filloi të refuzonte ushqimin në 31 mars në shenjë proteste për të kërkuar kujdes më të mirë mjekësor. Ai tha se ishte parë dy herë nga mjekë civilë dhe “duke pasur parasysh përparimin dhe rrethanat, ai do e përfundojë grevën e urisë”. Në një postim në instagram u bë me dije se procesi do të ishte gradual.
Mjekët e tij kishin paralajmëruar në fundjavë se ai mund të vdiste “nga momenti në moment”. Të enjten vonë ata e paralajmëruan atë se greva e mëtejshme mund ta dëmtojë atë në mënyrë të konsiderueshme dhe të çojë në vdekjen e tij.
Kritiku kryesor i Presidentit Vladimir Putin u arrestua sapo u kthye në Rusi në janar, pasi mori trajtim në Berlin pas helmimit me agjent nervor në Siberi që e la atë në koma dhe duke luftuar për jetën e tij.
Navalny u dërgua në një koloni penale në shkurt për më shumë se dy vjet e gjysmë, pasi një gjykatë vendosi që ai kishte thyer kushtet e një burgimi të pezulluar, edhe pse ai kishte qenë në koma. Rusia hodhi poshtë një vendim nga Gjykata Evropiane e të Drejtave të Njeriut që ai të lirohej sepse jeta e tij ishte në rrezik.
Mijëra mbështetës të Navalny dolën të mërkurën në rrugët e qyteteve ruse dhe më shumë se 1,700 u arrestuan.
