Një sipërmarrës italian 54 vjeç, Massimo Ferro, ka ndërruar jetë në muajin dhjetor në Tiranë, pas një ndërhyrjeje për ngushtimin e stomakut të kryer në klinikën private Trita Hospital.
Sipas mediave italiane, Ferro, banues në Camposampiero, kishte kontaktuar fillimisht një klinikë në Milano, ku iu propozua që ndërhyrja të kryhej në Shqipëri me një kosto rreth tre herë më të ulët se në Itali. Operacioni në Tiranë kushtonte 4.400 euro, ndërsa në Itali çmimi arrinte rreth 15 mijë euro.
Pas ndërhyrjes kirurgjikale në Tiranë, 54 vjeçari shfaqi komplikacione serioze shëndetësore dhe u dërgua në Qendrën Spitalore Universitare, ku ndërroi jetë më 22 dhjetor. Ngjarja ka vënë në lëvizje autoritetet italiane, ndërsa prokurori i Padovës, Andrea Girlando, ka regjistruar procedim penal për të zbardhur rrethanat e vdekjes.
Si persona të dyshuar janë marrë kirurgu Andrea Formiga, i cili operoi pacientin dhe bashkëpunon prej vitesh me Trita Hospital, si dhe dietologia Alessandra Freda, të dy nga Lombardia.
Nga hetimet paraprake rezulton se Massimo Ferro kishte komunikuar drejtpërdrejt me kirurgun përmes WhatsApp, ku ishin shkëmbyer informacionet mbi procedurën, kostot dhe udhëzimet logjistike për udhëtimin drejt Shqipërisë. Sipas familjarëve të viktimës, asnjë nga protokollet e detyrueshme sipas udhëzimeve italiane dhe ndërkombëtare për kirurgjinë e obezitetit nuk ishte ndjekur.
Në denoncimin e bërë thuhet se nuk ka pasur trajnim dietik paraprak, as vlerësim multidisiplinar dhe as përgatitje specifike para operacionit. I vetmi udhëzim i dhënë pacientit ishte që të mos konsumonte ushqim apo pije natën para ndërhyrjes.
Megjithëse Ferro vuante nga diabeti tip 2 dhe peshonte 108 kilogramë, analizat dhe testet para-operatore u kryen vetëm një ditë para operacionit, pasi ai kishte mbërritur në Tiranë. Ndërkohë, në një video të publikuar në faqen zyrtare të Trita Hospital, kirurgu Andrea Formiga prezantohet si mjek që, sipas përshkrimit, “pacientët e quajnë doktori i mrekullive”.
Hetimet nga Prokuroria italiane vijojnë për të përcaktuar përgjegjësitë dhe nëse janë shkelur standardet mjekësore që rregullojnë këtë lloj ndërhyrjeje kirurgjikale.
