Një 68-vjeçar ka rënë në prangat e policisë në Përmet, pasi dogji një sipërfaqe toke dhe 70 koshere me bletë. Ai i vuri flakën disa barishteve në tokën e tij, por zjarri doli jashtë kontrollit dhe u dogjën një sipërfaqe me bimësi dhe koshered me bletë që ishin në pronësi të shtetasit R. N.
Njoftimi i policisë:
Përmet
Vijon puna për identifikimin dhe vënien para përgjegjësisë ligjore të autorëve të zjarrvënieve.
Dogji me zjarr një sipërfaqe toke me bimësi dhe 70 koshere me bletë, vihet në pranga një shtetas.
Specialistët për Hetimin e Krimeve në Komisariatin e Policisë Përmet, në vijim të punës për zbulimin dhe vënien përpara përgjegjësisë ligjore të autorëve të zjarrvënieve, ndaluan shtetasin N. I., 68 vjeç, banues në fshatin Kosinë, Përmet.
Ky shtetas në datën 27.09.2021 ka ndezur zjarr për djegien e disa barishteve në tokën e tij dhe si pasojë zjarri i favorizuar dhe nga era, ka dal jashtë kontrollit duke djegur një sipërfaqe toke me bimësi dhe 70 koshere me bletë në pronësi të shtetasit R. N.
Materialet i kaluan Prokurorisë së Rrethit Gjyqësor Përmet, për veprime të mëtejshme.
Drejtoria Vendore e Policisë Gjirokastër apelon për të gjithë banorët, që në asnjë rast të mos shkaktojnë zjarrvënie, pasi do përballen me ligjin. Policia fton qytetarët që të denoncojnë në numrin 112 dhe Komisariatin Dixhital, për çdo rast të zjarrvënies apo të paligjshmërisë në tërësi, duke iu garantuar anonimatin dhe reagim të shpejtë e të paanshëm.
