5 persona janë arrestuar nga Prokuroria Speciale e Kosovës pasi akuzohen për krime lufte. Përmes një njoftimi në Facebook, Prokuroria ka njoftuar se pas hetimeve disa mujore, bashkë me Policinë e Kosovës kanë arrestuar 5 persona, por nuk i ka bërë me dije identitetet e tyre, por i ka identifikuar vetëm përmes inicialeve. Deri më tani as mediat në Kosovë nuk i kanë zbuluar emrat e plotë të të arrestuarve. Këto krime dyshohen se janë kryer gjatë kohës së luftës së fundit në Kosovë, ku mijëra njerëz civilë e të pafajshëm u torturuan dhe më pas, u vranë.
“D.C., D.N., N.S., S.J., M.Sh., më 5 maj 1999 kishin ndërmarrë aksion në disa fshatra, për të vrarë e maltretuar viktimat shqiptare,”-thuhet ndër të tjera në njoftimin e Prokurorisë.
NJOFTIMI I PLOTË:
Në kuadër të këtij aksioni, me urdhër të Prokurorit Special, janë ndaluar personat me inicialet: D.C., D.N., N.S., S.J., M.Sh., me dyshimin e arsyeshëm se të njëjtit, në bashkëkryerje edhe me pjesëtar tjerë të paidentifikuar të këtij grupi, të armatosur dhe të veshur me uniforma të kamufluara dhe uniforma jo të rregullta të policisë apo ushtrisë serbe, më 05.04.1999, në orët e para të mëngjesit, kishin ndërmarrë një aksion në fshatrat Inatoc (Kokaj), Llovcë, Pogragjë dhe Uglar, ku me qëllim dhe dashje kishin vrarë, plagosur, djegur për së gjalli viktimat civile shqiptare, marrë peng, dhunuar, rrahur, maltretuar, torturuar fizikisht dhe psiqikisht, plaçkitur, shkatërruar pronat e shqiptarëve dhe djegien e tyre, dëbuar popullatën civile shqiptare, shkatërruar dhe abuzuar objektet kulturore dhe fetare, veprime këto të sanksionuara sipas ligjeve vendore, zakoneve të luftës dhe Konventave Ndërkombëtare të Gjenevës dhe Protokolleve Shtesë. Prokuroria Speciale e Republikës së Kosovës, për personat e lartcekur do t’i ndërmerre veprime e mëtejme procedurale ligjore, derisa ndaj kësaj çështjeje penale do të vazhdojë me zhvillimin e hetimeve.
