Pika kufitare e Kakavijës do të jetë e mbyllur përkohësisht sot nga ora 07:00 deri në 23:00, për shkak të protestave dhe grevave që do të zhvillohen në Greqi, lidhur me tragjedinë e Tempit.
Doganierët grekë do të përfshihen në grevë, duke ndaluar kalimin e mjeteve në këtë periudhë.
Policia kufitare ka njoftuar se gjatë kësaj kohe do të lejohet kalimi vetëm për këmbësorët, mjetet që transportojnë produkte të prishshme dhe ato me emergjenca shëndetësore.
Protestat dhe grevat janë thirrur për të shënuar një vit nga aksidenti më i rëndë hekurudhor, që ndodhi më 28 shkurt 2023, kur një tren pasagjerësh u përplas me një tren mallrash në afërsi të qytetit Tempi, duke shkaktuar vdekjen e të paktën 57 personave dhe plagosjen e dhjetëra të tjerëve.
Hetimet e kryera pas aksidentit zbuluan se shkaku ishte një gabim njerëzor dhe probleme në sistemin hekurudhor.
Përgjegjësia kryesore i takoi shefit të stacionit të Larisës, i cili pranoi se kishte drejtuar trenin e pasagjerëve në të njëjtin shinat me trenin mallrash.
Ky incident shkaktoi protesta të shumta që kritikuan neglizhencën shtetërore në sigurinë hekurudhore.
Si pasojë, Ministri i Transportit dha dorëheqjen, ndërkohë që qeveria u angazhua për përmirësimin e sistemit të transportit hekurudhor.
