Për Kosovën kjo ishte fundjava e parë me masa të kufizuara dhe karantinë për disa qytete pas numrit të lartë të rasteve të reja me koronavirus.
Në fundjavë në Kosovë ka qenë e ndaluar veprimtaria e të gjitha subjekteve afariste dhe bizneseve, me qëllim frenimin e përhapjes së koronavirusit.Në këtë periudhë janë mbyllur edhe qendrat tregtare dhe rekreative dhe subjektet që ofrojnë shërbime të gastronomisë në të gjithë territorin e Kosovës.
Gjithashtu, qytetarëve të shtatë komunave të Kosovës – Prishtinë, Fushë Kosovë, Gjilan, Obiliq, Gjakovë, Podujevë dhe Shtime – u janë ndaluar hyrjet dhe daljet, përveç në disa raste të domosdoshme.
Ditën e sotme Ministri i Shëndetësisë Armend Zemaj ka zhvilluar sot një takim virtual me kryetarët e komunave, ku u bisedua për shqetësimet e ditëve të fundit dhe situatës epidemiologjike, si dhe për koordinimin e mëtejshëm për respektimin e masave kundër virusit COVID-19.
Gjatë fjalës së tij Zemaj tha se lakorja e rasteve të fundit na detyrojnë për kujdes të shtuar dhe aktiv, ku kërkohet bashkëpunim i ngushtë me komunat e Kosovës me theks me Kryetarët dhe Shtabet Komunale Emergjente dhe po ashtu bashkëpunim i të gjithë mekanizmave të institucioneve qendrore dhe lokale për zbatim rigoroz të masave të dala nga niveli qendror, është i domosdoshëm.
“Nga java e kaluar, kemi filluar me masa më të rrepta për disa qytete të Kosovës dhe do të vazhdojmë çdo ditë, me vendime operacionale, për komuna të caktuara në bazë të kategorizimit si pasojë e numrit të të infektuarve.“Kërkesat dhe rekomandimet do të jenë në funksion të luftës efikase kundër virusit Covid 19.Bashkë ia dalim!”, tha Zemaj.
Ndërkohë gjatë 24 orëve të fundit, në Laboratorin e Mikrobiologjisë Molekulare në IKShPK dhe laboratoret private, janë testuar gjithsej 1.794 mostra, prej të cilëve rezultojnë 730 raste pozitive.
