Një nga problemet e hasura gjatë periudhës së pandemisë ka qenë edhe riatdhesimi i shqiptatarëve.
Pavarësisht paralajmërimeve të qeverisë, emigrantët janë dyndur në kufirin me Greqinë.
Një pjesë e tyre janë lejuar të futen në territorin shqiptar, me kushtin që të kalojnë 14 ditë në hotel dhe të paguajnë vetë shpenzimet.
Ata që janë rezidentë në një shtet tjetër nuk janë lejuar të futen, deri në një urdhër të dytë nga qeveria.
“Dosja.al” raporton se konvikti i Universitetit të Shkodrës është dezinfektuar dhe do të kthehet në karantinë për shqiptarët që do të vijnë nga jashtë.
Ky konvikt ka një kapacitet prej 360 shtretërish dhe është parashikuar që në dhomë të qëndrojë vetëm një person.
Në Shkodër ndërkohë situata vijon të jetë problematike, pasi numërohen 70 të infektuar.
Vetëm ditën e djeshme në qytetin verior u regjistruan 13 raste të reja, më shumë sesa dyfishi i Tiranës, e cila shënoi vetëm 6.
Në rang kombëtar, bilanci i COVID-19 është 467, në mesin e të cilëve 232 të shëruar dhe 24 viktima.
