Policia ka arrestuar ditën e sotme dy shtetas në doganën e Morinit pasi po tentonin të kalonin drejt Kosovës në mënyrë të paligjshme 36 sirianë.
Në njoftimin e policisë thuhet se dy shtetasit me iniciale P., 33 vjeç dhe M. D., 22 vjeç, të dy banues në Tiranë janë arrestuar në kuadër të operacionit i koduar “Sprinter”.
Policia bën të ditur se të arrestuarit do t’i ndihmonin shtetasit sirianë, kundrejt fitimit, që të kalonin kufirin në drejtim të Kosovës, në mënyrë të paligjshme.
Njoftimi i policisë
Morinë
Finalizohet me sukses operacioni policor i koduar “Sprinter”.
Operacioni policor nga Policia kufitare, për goditjen e tentativave për dhënie ndihmë shtetasve nga vendet e treta, kundrejt fitimit, për të kaluar kufirin në mënyrë të paligjshme.
Shërbimet e Policisë Kufitare, pas një pune disaditore, mbi bazën e informacioneve të marra në rrugë operative, si dhe në zbatim të planit të masave, me qëllim parandalimin dhe goditjen e tentativave për dhënie ndihmë shtetasve nga vendet e treta, kundrejt fitimit, për të kaluar kufirin në mënyrë të paligjshme, kanë finalizuar me sukses operacionin e koduar “Sprinter” në kuadrin e të cilit u arrestuan dy shtetas, konkretisht:
E. P., 33 vjeç, banues në Tiranë.
M. D., 22 vjeç, banues në Tiranë.
Shtetasit e lartpërmendur u kapën nga shërbimet e Policisë Kufitare, në afërsi të PKK Morinë, me automjetin fugon tip “Sprinter”, me të cilin po transportonin 36 shtetas sirianë.
Shtetasit E. P. dhe M. D. do t’i ndihmonin shtetasit sirianë, kundrejt fitimit, që të kalonin kufirin në drejtim të Kosovës, në mënyrë të paligjshme.
Në përfundim të veprimeve hetimore, specialistët për Hetimin e Trafiqeve të Paligjshme në DVP Kukës bënë arrestimin në flagrancë të tyre.
Materialet i kaluan për veprime të mëtejshme, Prokurorisë së Rrethit Gjyqësor Kukës, për veprën penale “Ndihma për kalim të paligjshëm të kufijve”.
