Përfaqësuesit e katër unioneve shqiptare të besimit mysliman në Zvicër, Gjermani, Austri dhe Itali, kanë mbledhur një fond të konsiderueshëm, për t’u ardhur në ndihmë të prekurve nga tërmeti.
Ata kanë mbërritur në Shqipëri, për të nisur aktivitetin në Thumanë.
Sipas “Dosja.al”, përfaqësuesit e unioneve myslimane janë pritur nga myftiu i Krujës, Erjol Haxhiu.
Ky i fundit i ka shoqëruar në tërë zonën e Thumanës, për të parë dëmet e shkaktuara nga tërmeti.
Përfaqësuesi i diasporës dhe koordinatori i Unionit të Xhamive, Mehas Alija, deklaroi se do të investojnë në ndërtimin e banesave në Thumanë.
Përfaqësuesit e unioneve kanë inkurajuar banorët për më shumë shpresë dhe optimizëm, referuar edhe investimeve që do të bëjnë në zonë.
Ata janë falenderuar për kontributin nga banorët e Thumanës.
Tërmeti i 26 nëntorit ishte më i forti i 30 viteve të fundit.
Ai la pas 51 të vdekur dhe qindra të plagosur.
Mijëra qytetarë kanë mbetur pa shtëpi, ndërsa vijojnë inspektimet në banesat e dëmtuara.
Njëkohësisht, shoqata të ndryshme brenda dhe jashtë vendit, kanë nisur mbledhjen e ndihmave.
