Kryeministri Edi Rama paralajmëroi sot masa të reja shtrënguese për parandalimin e përhapjes së COVID-19.
Rama tha se nuk do të ketë më tolerime, ku përtej gjobave, policia në rast grumbullimesh do të përdorë forcën, madje edhe ujë apo gaz lotësjellës.
Shefi i qeverisë tha se vlonjatët kanë vendosur që në orën 7 të dalin në ballkon dhe të shjanë virusin nga motra.
Kryeministri mbështeti këtë nismë, por me kushtin që të mos kalojnë pragun e shtëpisë, por ta bëjnë nga ballkoni.
“Deri të hënën në orën 5 të mëngjesi asnjë hap larg shtëpisë. Më shkruajnë nga Vlora se kanë vendosur të dalin në ballkon ne 7 të shajnë virusin nga motra. Se di si duruan kaq gjatë që s’u morën me motrën e kompetentin. Unë bashkohem sot dhe u jap mbështetjen time si deputet i Vlorës, me kusht që ta bëjnë nga ballkoni dhe mos të bëjnë xhap (hap) jashtë derës së shtëpisë. Ne të tjerët duhet të bëjnë ritualin në shtëpi dhe t’u tregojmë vendin këtyre tradhtarëve të kësaj pakice të vogël që po na prish punë dhe tu japim njëri-tjetrin ndihmën e nevojshme shqiptarëve. Rrugë tjetër nuk ka dhe kush kërkon rrugë tjetër mund t’i bjerë murit me kokë për mos të dalë nga shtëpia.”, tha Rama.
Përsa i përket orarit të ri për lëvizjen e këmbësorëve 05:00-13:00, kryeministri tha se do të jetë në fuqi përgjatë gjithë javës tjetër.
Ndërkohë dita e nesërme do të jetë izolim total dhe në rrugë do të jetë vetëm ushtria, makina e shërbimeve të emergjencës, makinat shtetërore dhe mediat.
Kujtojmë këtu se numri i të prekurve nga COVID-19 në vendin tonë është 76, nga të cilët dy viktima dhe një i shëruar.
Tek spitali Infektiv janë shtruar 37 persona, 4 prej të cilëve mbahen në terapi intensive.
Autoritetet ndërkohë kanë vijuar me thirrjet për respektimin e higjienës dhe distancimit social.
