Kabineti i Sigurisë në Izrael ka miratuar planin e propozuar nga Kryeministri Benjamin Netanyahu, sipas të cilit ushtria izraelite do të marrë kontrollin e Qytetit të Gazës, si pjesë e një strategjie për “shkatërrimin” e Hamasit në këtë enklavë të rrënuar nga lufta.
Plani parashikon që, paralelisht me operacionet ushtarake, të shpërndahen ndihma humanitare për popullsinë civile në zonat jashtë vijave të frontit.
I vendosur nën trysni të fortë, si në planin e brendshëm ashtu edhe nga aleatët ndërkombëtarë për të ndaluar ofensivën dhe për të siguruar lirimin e pengjeve që ende mbahen në Gaza, Netanyahu deklaroi se Izraeli synon të ushtrojë kontroll të plotë mbi territorin, por pa synuar ta qeverisë atë.
“Qëllimi është krijimi i një perimetri sigurie, e më pas dorëzimi i administrimit të Gazës tek forca arabe që mund ta qeverisin pa rrezikuar sigurinë tonë dhe duke u ofruar palestinezëve një jetë më të mirë. Diçka e tillë nuk mund të ndodhë me Hamasin në fuqi,” u shpreh Netanyahu.
Ndërkohë, analizat e brendshme dhe raportimet nga Instituti Izraelit për Studime të Sigurisë Kombëtare sugjerojnë se operacioni do të zhvillohet me faza: fillimisht do të merret kontrolli në veri të Gazës, për të vazhduar më tej në jug. Operacioni pritet të angazhojë rreth pesë divizione ushtarake dhe mbi 50 mijë trupa, ndërsa zgjatja e tij parashikohet të jetë pesëmujore me një kosto ditore prej 18 milionë eurosh.
Në këtë klimë tensioni, janë shtuar shqetësimet për sigurinë e pengjeve që ndodhen ende në territorin palestinez. Zërat kritikë paralajmërojnë se ky plan mund të përbëjë një hap drejt aneksimit të Gazës, me pasoja që shkojnë përtej ushtarakeve: ndërtimi i kampeve humanitare, emigrim të detyruar dhe, sipas disa komentuesve jetësimi i të ashtuquajturës “Rivierë Trump”, si pjesë e një projekti për zgjerimin territorial të Izraelit.
Ndërsa kabineti i sigurisë diskutonte planet për ofensivën, qindra protestues u mblodhën para zyrës së kryeministrit në Tel Aviv, duke kërkuar arritjen e një marrëveshjeje për lirimin e pengjeve.
