Një zjarr i fuqishëm përfshiu pasditen e djeshme tregun ambulant në lagjen 13 të Durrësit, duke shkrumbuar pothuajse të gjithë hapësirën e tij.
Më shumë se 20 dyqane me struktura llamarine u dogjën plotësisht, ndërsa flakët u përhapën me shpejtësi, duke shkaktuar panik mes tregtarëve dhe banorëve.
Tym i dendur e vështirësoi ndërhyrjen e forcave zjarrfikëse, të cilat megjithatë arritën në vendngjarje, por dëmet mbetën të mëdha dhe mallrat u shkatërruan plotësisht.
Autoritetet kanë nisur një hetim nën drejtimin e Prokurorisë, ndërsa pronari i tregut është proceduar në gjendje të lirë.
Hetimet vijojnë dhe pritet akt-ekspertiza për të zbardhur plotësisht shkaqet e zjarrit. Bazuar në provat e grumbulluara deri tani, pista kryesore mbetet një shkëndijë elektrike, që dyshohet se ka shkaktuar zjarrin.
Banorët dhe tregtarët janë shprehur të pakënaqur me reagimin e autoriteteve, duke akuzuar për vonesa dhe mungesë kontrolli, si dhe theksuar se kjo ngjarje është pasojë e neglizhencës së përsëritur.
“Siç i patëm ato 5 lekë, na u bënë shkrumb e hi, nuk e di çfarë do bëjmë me jetën tonë, janë djegur me miliona lekë. I kemi akoma lekët e mallit borxh pa larë në Tiranë, ata nuk duan t’ja dinë, duan lekët e mallit që kemi marrë, kështu do qofshim” – thanë tregtarët.
Në njoftimin paraprak, policia e Durrësit deklaroi:
“Nga veprimet e deritanishme hetimore dyshohet se zjarri është shkaktuar nga një shkëndijë elektrike në çatinë e njërit prej dyqaneve, dhe është përhapur si pasojë e erës. Si pasojë pati vetëm dëme materiale.”
Hetimet për zbardhjen e plotë të ngjarjes vijojnë, ndërsa pronari i tregut mbetet nën hetim në gjendje të lirë.
