Reagimet e ndërkombëtarëve vazhdojnë ende edhe pse PD-ja duket se e ka vendosur.
Megjithatë edhe një tjetër reagim na vjen nga një tjetër organizëm i rëndësishëm, ai i OSBE-së, ku në një deklaratë publike të ngjashme paksa me atë të Ambasadës të Shteteve të Bashkuara ku thotë se djegia e mandateve minon procesin demokratik të vendit dhe për pasojë kjo reflekton pengesë në reformat thelbësore.
Gjithashtu në formë të prerë thuhet se nuk mund të tolerohen kurrsesi akte dhunë, të gjithë ata që i iniciojnë ose demonstrojnë akte të tilla do të mbajnë përgjegjësi deri në fund.
“Vendimi i deputetëve të opozitës për t’u dorëhequr nga Kuvendi minon procesin demokratik ligjvënës dhe përbën një heqje dorë nga përgjegjësia e tyre për të përfaqësuar qytetarët që i kanë votuar. Reformat thelbësore dhe gjerësisht të mbështetura po vonohen.
Prezenca e OSBE-së këshillon fuqishëm që të mos ndërmerret asnjë përpjekje për të tronditur themelet e demokracisë përmes dhunës, që të mos ndryshohet procesi demokratik përmes presionit jodemokratik. Ata që mundësojnë dhe nxisin dhunën do të mbajnë përgjegjësi. Na vjen keq që paralajmërimet e kaq shumë miqve dhe partnerëve afatgjatë të Shqipërisë nuk u dëgjuan.
Bazuar në përkrahjen tonë të kahershme për Shqipërinë, ne bëjmë thirrje për sjellje të përgjegjshme dhe për rifillim të procesit demokratik në Kuvend, një nga arritjet e Shqipërisë demokratike moderne. Shqipëria ka bërë përparim domethënës përgjatë dy dhjetëvjeçarëve të fundit, në fushën politike, ekonomike dhe shoqërore, duke lënë pas autoritarizmin. Ky përparim duhet të vijojë për të mirën e të gjithë qytetarëve shqiptarë dhe jo të përmbyset në dobi të një grushti dhunuesish”, thuhet në reagim.
Ndërkombëtarët janë treguar të ashpër me opozitën për çfarë ndodhi në protestë dhe me vendimin e djegies së mandateve, mirëpo nuk dihet çfarë mund të pritet pas këtyre reagimeve.
