Gjykata e Apelit të Krimeve të Rënda ka lënë sot në fuqi masën e sigurisë ‘Arrest me burg ndaj biznesmenit, Gentian Malindi, i cili akuzohet si pritësi i 137 kg kokainë në portin e Durrësit.
Babai i tij, avokati Ilir Malindi, ka reaguar ashpër për akuzat ndaj djalit të tij.
Ai pretendon se i njeh porositësit e vërtetë, por nuk ka përmendur emra.
Sipas avokatit, kemi të bëjmë me një organizatë kriminale, që është pjesë e Prokurorisë.
Më tej ai ka shtuar, se porositësi është vetë shteti, duke filluar që nga Këshilli i Ministrave.
Malindi sqaron se i biri do të dorëzohet, kur të bëhen kallëzimet ndaj Ardian Veliut dhe policisë, për shpërdorim detyre.
“ Nëse veprojnë kështu kemi të bëjmë me një organizatë kriminale që është pjesë në Prokurori. Është e pamundur që në të njëjtën ditë të kishin të dyja procesverbalet. Ne do të kërkojmë për ata hetim për shpërdorim detyre dhe falsifikim. Nuk ecet me drejtësi me këto poshtërsi. Porositësi i ngarkesës është dikush tjetër. Unë po ju them diçka, që në 137 kg kokainë, vlera shkon në 11 milionë euro, në Pire u kapën edhe 700 kile të tjera dhe vlera shkon në 45 milionë, ku i gjeta unë, ai, gjithë këto para. Tani porositësit e vërtetë është shteti vetë që është një mafia e organizuar. Organizatë e strukturuar kriminale janë ata që nga Këshilli i Ministrave e poshtë, e kanë katandisur këtë vend në një skëterrë. Mendja ime më shkon lart. Gentiani do të dorëzohet kur të paraqiten provat, pasi të bëjmë ne kallëzimet ndaj Ardi Veliut dhe Policisë. Po nuk hynë prokurorë dhe gjyqtarë në burg për veprimet e tyre këtu nuk do të drejtësi në vend.”, u shpreh ai.
Gentian Malindi pak kohë më parë i ka dërguar një letër Apelit për Krimet e Rënda, ku sqaron se gjithçka është një hakmarrje.
Ai dhe familja e tij, pretendojnë se prokuroria dhe policia kanë manipuluar provat dhe dëshmitë.
Kujtojmë këtu se më 27 shtator në portin e Durrësit u seksuestruan 137 kg kokainë, të cilat ndodheshin në motorrët frigoriferikë, në 4 kontenierë bananesh.
Lënda narkotike ishte nisur nga Ekuadori dhe ishte pikasur më parë në Pire.
Në Greqi autoritetet zëvendësuan kokainën me oriz dhe gips dhe më pas vendosën GPS.
