Në kuadër të aktiviteteve për “Ditën e Verës 2026”, në disa segmente rrugore të Tiranës do të vendosen kufizime të përkohshme të qarkullimit të automjeteve. Masat janë marrë për të garantuar zhvillimin normal të aktiviteteve të organizuara nga Bashkia e Tiranës.
Sipas njoftimit, nga data 13 mars 2026, ora 22:00, deri më 14 mars, në orën 18:00, do të ketë kufizime në këto akse: bulevardi “Dëshmorët e Kombit” nga Ministria e Brendshme deri në fillim të ish “Hotel Dajti”; bulevardi “Dëshmorët e Kombit” nga Ura e ish “Hotel Dajti” deri në kryqëzimin me rrugën “Ismail Qemali”; bulevardi “Dëshmorët e Kombit” nga kryqëzimi i rrugës “Ismail Qemali” deri në kryqëzimin me rrugën “Gjergj Filipi”; si edhe bulevardi “Dëshmorët e Kombit” nga kryqëzimi i rrugës “Gjergj Filipi” deri në fillim të sheshit “Nënë Tereza”.
Ndërkohë, nga data 13 mars 2026, ora 12:00, deri në datën 15 mars, në orën 02:00, kufizimet do të zbatohen edhe në rrugën “Dëshmorët e 4 Shkurtit”, nga kryqëzimi me rrugën “Ismail Qemali” deri në kryqëzimin me rrugën “Brigada VIII”, si dhe në rrugën “Pjetër Bogdani”, nga kryqëzimi me rrugën “Sami Frashëri” deri në kryqëzimin me rrugën “Gjin Bue Shpata”.
Qarkullimi i automjeteve, mjeteve të emergjencës dhe Policisë së Shtetit do të zhvillohet sipas planit të lëvizjes, përmes rrugës “Lek Dukagjini”, rrugës “Abdyl Frashëri”, rrugës “Papa Gjon Pali II”, rrugës “Sami Frashëri”, bulevardit “Zhan D’Ark”, bulevardit “Bajram Curri”, rrugës “Myslym Shyri” dhe rrugës “Abdi Toptani”.
Edhe linjat urbane do të ndjekin një itinerar të ndryshuar. Linja nr. 13 “Tirana e Re” dhe linja nr. 2 “Teg – Sauk i Vjetër – Kopshti Zoologjik – Ish-Stacioni i Trenit” do të devijojnë te sheshi “Willson” dhe te bulevardi “Zogu I”.
