Sot është Dita Botërore e Sensibilizimit kundër HIV/AIDS, e cila organizohet çdo vit më 1 dhjetor për të rritur ndërgjegjësimin në lidhje me HIV/AIDS dhe për të demonstruar solidaritetin ndërkombëtar në përballimin e kësaj pandemie. Kjo ditë është një mundësi për të shpërndarë informacion lidhur me situatën e kësaj pandemie dhe për të inkurajuar përparimin në parandalimin, trajtimin dhe kujdesin për HIV/AIDS në të gjithë botën, veçanërisht në vendet me prevalencë të lartë.
Ndërkaq presidenti i Republikës Ilir Meta kërkon reflektim mbi nevojën e përmirësimit të vazhdueshëm të kujdesit shëndetësor. Në Ditën Botërore kundër HIV/AIDS, Presidenti Meta ka dhënë një mesazh, duke kujtuar jetët e humbura nga kjo sëmundje në vendin tonë, teksa thekson se me rëndësi mbetet edukimi cilësor dhe ndërgjegjësimi, sidomos i të rinjve.
“Në Ditën Botërore kundër HIV/AIDS kujtojmë jetët e humbura prej saj në vendin tonë, për të reflektuar mbi nevojën e përmirësimit të vazhdueshëm të kujdesit shëndetësor.
Me rëndësi mbetet edukimi cilësor dhe ndërgjegjësimi, sidomos i të rinjve, për të minimizuar jo vetëm përhapjen, por edhe luftuar paragjykimet dhe diskriminimin, që bëhen pengesë për shërbimet e parandalimit dhe trajtimit. #ËorldAIDSDay”, shkruan Meta.
Vlen të theksojmë kanalet e transmetimit të HIV/AIDS:
Marrëdhënie seksuale të pambrojtura, vaginale ose anale.
Infeksione seksualisht të transmetueshme si sifilizi, herpesi, klamidia, gonorrea dhe vaginosa bakterore.
Shkëmbimin e gjilpërave të kontaminuara, shiringave dhe pajisjeve të tjera gjatë injektimit të drogës.
Marrjen e injeksioneve apo transfuzioneve të gjakut të pasigurta, si dhe procedurat mjekësore që përfshijnë prerjen josterile me instrumente të mprehta të kontaminuara.
Shpimet aksidentale me gjilpërë, përfshirë dëmtimet e stafit shëndetësor.
Transmetimin nga një nënë e infektuar te fëmija i saj gjatë shtatzënisë, lindjes dhe ushqyerjes me gji.
